Parêzer Rabîa Ozgokçe, diyar kir ku vekişandina ji Peymana Stenbolê wêrekiyê dide faîlên tundiyê û ev tişt got: “Ez difikirim ku ev amadekariya hilbijartina pêşwaxt e. Ji bo ku sozê hilbijartinê bidin beşeke civakê dev ji maf û jiyana jinan ber didin. Ez vê xeternak dibînim.”
Li ser medya civakî dîmenê ku li Muglayê mêr tundiyê li jinê dike hat belavkirin. Li ser vê yekê bertekên li dijî tundiyê zêde bûn. Li ser hesabê Twitterê bi etîketa #BilaEngînCeylanBêGirtin (#EnginCeylanTutuklansın) bertekên xwe anîn ziman û xwest faîl bê girtin.
Dayika bi navê M.K. bertek nîşanî serbest berdana Seyfûllah T. ê li navçeya Xozatê îstîsmarî zaroka wê ya 9 sali kiribû, da û dest nîşan kir ji bo ku dev ji giliyê berde, rastî gefan tê. M.K., diyar kir ku ji bo vê pere teklifê wê hatiye kirin û got: “Ez xwe ji vê dozê nedim alî.”
Li gor hiqûqnasan hêzeke serokkomar ya ku qanûna jimare 6284'an betal bike tune ye.
Endama Konseya Navendî ya TTB'ê Bijîşk Meltem Gunbegî, destnîşan kir ku ji bo tenduristiya civakê pêşî divê tenduristiya jinê baş be. GUnbegî, ji bo civakeke tenduristiya wê baş, îşaret bi Peymana Stenbolê kir ku hemû mafên jinan diparêze.
Komîsyona Dîplomasî ya Jinan a HDP’ê bi Seroka AKPM’yê Petra Bayer re civiya. Di civînê de nerazîbûn nîşanî desthilata AKP-MHP’ê hate dayîn ku ji Peymana Stenbolê vekişiyane.
Baroya Amedê, ji bo ku KADES bi Kurdî jî, xizmetê bike serî li Wezareta Karên Hûndir da.
Fikriye Ozbek ku li dijî hevjînê xwe Hakan Ozbek ku tundiya sistematik lê kiribû parastina rewa kiribû û bûbû sedema mirina wî, di danişînê de serboriya xwe vegot û parêzera wê jî ev pirs ji heyeta dadgehê kir: “Heke Fikriye zilam bûna jî we yê dîsa bi vî rengî ceza bixwesta.”
Cîgira Hevseroka Giştî ya ESP'ê Beycan Taşkiran, anî ziman ku dewlet ji têkoşîna jinan ditirse û got: "Di navbera tevgera azadiyê ya jinan de û dewleta mêr de şer û pevçûneke mezin heye. Kesên ku ji ber vî şerî peymanê ji holê rakirin, dixwazin profîleke 'jina maqûl' çêbikin."
Berdevka Meclîsa Jinan a HDP'ê Ayşe Acar Başaran derbarê betalkirina Peymana Stenbolê de got: "Ji Peymana Stenbolê deshilatdariya AKP-MHP'ê vekişiya, jin venekişiyan e."
Jinên êlihî, ji bo piştgiriyê bidin Emîne û Ferît Şenyarşar hatin Edliya Rihayê. Jinan, diyar kirin ku heya malbata Şenyaşar bê berdan ewê li qada çalakiyê nobetê bigirin.
Platforma EŞÎK’ê derbarê Peymana Stenbolê de, ji bo Konseya Ewropayê nameyek bang nivîsand û wiha got: “Em dixwazin qanûnîkirina danezana derbarê peymanê de û bandorên wê yên di warê hiqûqa navneteweyî de bên lêkolînkirin.”
Rahîme Aslan a ji aliyê hevjînê xwe ve 8 sal in tundiya sistematik lê tê kirin xwest ku Peymana Stenbolê bê pêkanîn û wiha got: “Ez naxwazim bimirim, dixwazim keça xwe mezin bikim.”
Jinên KESK’î, diyar kirin ku bi biryara vekişandina ji Peymana Stenbolê, tune hesibandina jinane û gotin: “Ev biryar tenê jinan eleqeder nake, di heman demê de zilaman jî eleqeder dike. Kesên li dijî vê biryarê dengê xwe dernexin, alîgirin.”